অষ্টাদশ অধ্যায়ঃ মোক্ষযোগ

অষ্টাদশ অধ্যায়

অর্জুন উবাচ - সন্ন্যাসস্য মহাবাহো তত্ত্বমিচ্ছামি বেদিতুম্ । ত্যাগস্য চ হৃষীকেশ পৃথক্ কেশিনিসূদন ।। ১

শ্রীভগবানুবাচ - কাম্যানাং কর্মণাং ন্যাসং সন্ন্যাসং কবয়ো বিদুঃ । সর্বকর্মফলত্যাগং প্রাহুস্ত্যাগং বিচক্ষণাঃ ।। ২

ত্যাজ্যং দোষবদিত্যেকে কর্ম প্রাহুর্মনীষিণঃ । যজ্ঞদানতপঃকর্ম ন ত্যাজ্যমিতি চাপরে ।। ৩

নিশ্চয়ং শৃণু মে তত্র ত্যাগে ভরতসত্তম । ত্যাগো হি পুরুষব্যাঘ্র ত্রিবিধঃ সংপ্রকীর্তিতঃ ।। ৪

যজ্ঞদানতপঃকর্ম ন ত্যাজ্যং কার্য্যমেব তৎ । যজ্ঞো দানং তপশ্চৈব পাবনানি মনীষিণাম্ ।। ৫

এতান্যপি তু কর্মাণি সঙ্গং ত্যক্ত্বা ফলানি চ । কর্তব্যানীতি মে পার্থ নিশ্চিতং মতমুত্তমম্ ।। ৬

নিয়তস্য তু সন্ন্যাসঃ কর্মণো নোপপদ্যতে । মোহাৎ তস্য পরিত্যাগস্তামসঃ পরিকীর্তিতঃ ।। ৭

দুঃখমিত্যেব যৎ কর্ম কায়ক্লেশভয়াৎ ত্যজেৎ । স কৃত্বা রাজসং ত্যাগং নৈব ত্যাগফলং লভেৎ ।। ৮

কার্য্যমিত্যেব যৎ কর্ম নিয়তং ক্রিয়তেহর্জুন । সঙ্গং ত্যক্ত্বা ফলষ্ণৈব স ত্যাগঃ সাত্ত্বিকো মতঃ ।। ৯

ন দ্বেষ্ট্যকুশলং কর্ম কুশলে নানুষজ্জতে । ত্যাগী সত্ত্বসমাবিষ্টো মেধাবী ছিন্নসংশয়ঃ ।। ১০

ন হি দেহভৃতা শক্যং ত্যক্তুং কর্মাণ্যশেষতঃ । যস্তু কর্মফলত্যাগী স ত্যাগীত্যভিধীয়তে ।। ১১

অনিষ্টমিষ্টং মিশ্রঞ্চ ত্রিবিধঃ কর্মণঃ ফলম্ । ভবত্যত্যাগিনাং প্রেত্য ন তু সন্ন্যাসিনাং ক্বচিৎ ।। ১২

পঞ্চেমানি মহাবাহো কারণানি নিবোধ মে । সাংখ্যে কৃতান্তে প্রোক্তানি সিদ্ধয়ে সর্বকর্মণাম্ ।। ১৩

অধিষ্ঠানং তথা কর্তা করণং চ পৃথগ্বিধম্ । বিবিধাশ্চ পৃথক্ চেষ্টা দৈবঞ্চৈবাত্র পঞ্চমম্ ।। ১৪

শরীরবাঙ্মনোভির্যৎ কর্ম প্রারভতে নরঃ । ন্যায্যং বা বিপরীতং বা পঞ্চৈতে তস্য হেতবঃ ।। ১৫

তত্রৈবং সতি কর্তারমাত্মানং কেবলন্তু যঃ । পশ্যত্যকৃতবুদ্ধিত্বান্ন স পশ্যতি দুর্মতিঃ ।। ১৬

যস্য নাহংকৃতো ভাবো বুদ্ধির্যস্য ন লিপ্যতে । হত্বাপি স ইমাঁল্লোকান্ ন হন্তি ন নিবধ্যতে ।। ১৭

জ্ঞানং জ্ঞেয়ং পরিজ্ঞাতা ত্রিবিধা কর্মচোদনা । করণং কর্ম কর্তেতি ত্রিবিধঃ কর্মসংগ্রহঃ ।। ১৮

জ্ঞানং কর্ম চ কর্তা চ ত্রিধৈব গুণভেদতঃ । প্রোচ্যতে গুণসংখ্যানে যথাবচ্ছৃণু তান্যপি ।। ১৯

সর্বভূতেষু যেনৈকং ভাবমব্যয়মীক্ষতে । অবিভক্তং বিভক্তেষু তজ্‌জ্ঞানং বিদ্ধি সাত্ত্বিকম্ ।। ২০

পৃথক্ত্বেন তু যজ্‌জ্ঞানং নানাভাবান্ পৃথগ্বিধান্ । বেত্তি সর্বেষু ভূতেষু তজ্‌জ্ঞানং বিদ্ধি রাজসম্ ।। ২১

যৎ তু কৃৎস্নবদেকস্মিন্ কার্যে সক্তমহৈতুকম্ । অতত্ত্বার্থবদল্পঞ্চ তং তামসমুদাহৃতম্ ।। ২২

নিয়তং সঙ্গরহিতমরাগদ্বেষতঃ কৃতম্ । অফলপ্রেপ্সুনা কর্ম যৎ তৎ সাত্ত্বিকমুচ্যতে ।। ২৩

যৎ তু কামেপ্সুনা কর্ম সাহঙ্কারেণ বা পুনঃ । ক্রিয়তে বহুলায়াসং তদ্রাজসমুদাহৃতম্ ।। ২৪

অনুবন্ধং ক্ষয়ং হিংসামনপেক্ষ্য চ পৌরুষম্ । মোহাদারভ্যতে কর্ম যৎ তৎ তামসমুচ্যতে ।। ২৫

মুক্তসঙ্গোহনহংবাদী ধৃত্যুৎসাহসমন্বিতঃ । সিদ্ধ্যসিদ্ধ্যোর্নির্বিকারঃ কর্তা সাত্ত্বিক উচ্যতে ।। ২৬

রাগী কর্মফলপ্রেপ্সুর্লুব্ধো হিংসাত্মকোহশুচিঃ । হর্ষশোকান্বিতঃ কর্তা রাজসঃ পরিকীর্তিতঃ ।। ২৭

অযুক্তঃ প্রাকৃতঃ স্তব্ধঃ শঠো নৈষ্কৃতিকোহলসঃ । বিষাদী দীর্ঘসূত্রী চ কর্তা তামস উচ্যতে ।। ২৮

বুদ্ধের্ভেদং ধৃতেশ্চৈব গুণতস্ত্রিবিধং শৃণু । প্রোচ্যমানমশেষেণ পৃথক্ত্বেন ধনঞ্জয় ।। ২৯

প্রবৃত্তিঞ্চ নিবৃত্তিঞ্চ কার্যাকার্যে ভয়াভয়ে । বন্ধং মোক্ষঞ্চ যা বেত্তি বুদ্ধিঃ সা পার্থ সাত্ত্বিকী ।। ৩০

যয়া ধর্মমধর্মঞ্চ কার্যঞ্চাকার্যমেব চ । অযথাবৎ প্রজানাতি বুদ্ধিঃ সা পার্থ রাজসী ।। ৩১

অধর্মং ধর্মমিতি যা মন্যতে তমসাবৃতা । সর্বার্থান্ বিপরীতাংশ্চ বুদ্ধিঃ সা পার্থ তামসী ।। ৩২

ধৃত্যা যয়া ধারয়তে মনঃপ্রাণেন্দ্রিয়ক্রিয়াঃ । যোগেনাব্যভিচারিণ্যা ধৃতিঃ সা পার্থ সাত্ত্বিকী ।। ৩৩

যয়া তু ধর্মকামার্থান্ ধৃত্যা ধারয়তেহর্জুন । প্রসঙ্গেন ফলাকাঙ্ক্ষী ধৃতিঃ সা পার্থ রাজসী ।। ৩৪

যয়া স্বপ্নং ভয়ং শোকং বিষাদং মদমেব চ । ন বিমুঞ্চতি দুর্মেধা ধৃতিঃ সা পার্থ তামসী ।। ৩৫

সুখং ত্বিদানীং ত্রিবিধং শৃণু মে ভরতর্ষভ । অভ্যাসাদ্রমতে যত্র দুঃখান্তঞ্চ নিগচ্ছতি ।। ৩৬

যত্তদগ্রে বিষমিব পরিণামেহমৃতোপমম্ । তৎ সুখং সাত্ত্বিকং প্রোক্তমাত্মবুদ্ধিপ্রসাদজম্ ।। ৩৭

বিষয়েন্দ্রিয়সংযোগাদ্ যত্তদগ্রেহমৃতোপমম্ । পরিণামে বিষমিব তৎসুখং রাজসং স্মৃতম্ ।। ৩৮

যদগ্রে চানুবন্ধে চ সুখং মোহনমাত্মনঃ । নিদ্রালস্যপ্রমাদোত্থং তৎ তামসমুদাহৃতম্ ।। ৩৯

ন তদস্তি পৃথিব্যাং বা দিবি দেবেষু বা পুনঃ । সত্ত্বং প্রকৃতিজৈর্মুক্তং যদেভিঃ স্যাত্রিভির্গুণৈঃ ।। ৪০

ব্রাহ্মণক্ষত্রিয়বিশাং শূদাণাঞ্চ পরন্তপ । কর্মাণি প্রবিভক্তানি স্বভাবপ্রভবৈর্গুণৈঃ ।। ৪১

শমো দমস্তপঃ শৌচং ক্ষান্তিরার্জবমেব চ । জ্ঞানং বিজ্ঞানমাস্তিক্যং ব্রহ্মকর্ম স্বভাবজম্ ।। ৪২

শৌর্য্যং তেজো ধৃতির্দাক্ষ্যং যুদ্ধে চাপ্যপলায়নম্ । দানমীশ্বরভাবশ্চ ক্ষাত্রং কর্ম স্বভাবজম্ ।। ৪৩

কৃষিগৌরক্ষ্যবাণিজ্যং বৈশ্যকর্ম স্বভাবজম্ । পরিচর্যাত্মকং কর্ম শূদ্রস্যাপি স্বভাবজম্ ।। ৪৪

স্বে স্বে কর্মণ্যভিরতঃ সংসিদ্ধিং লভতে নরঃ । স্বকর্মনিরতঃ সিদ্ধিং যথা বিন্দতি তচ্ছৃণু ।। ৪৫

যতঃ প্রবৃত্তির্ভূতানাং যেন সর্বমিদং ততম্‌ । স্বকর্মণা তমভ্যর্চ্য সিদ্ধিং বিন্দতি মানবঃ ।। ৪৬

শ্রেয়ান্ স্বধর্মো বিগুণঃ পরধর্মাৎ স্বনুষ্ঠিতাৎ । স্বভাবনিয়তং কর্ম কুর্বন্নাপ্নোতি কিল্বিষম্‌ ।। ৪৭

সহজং কর্ম কৌন্তেয় সদোষমপি ন ত্যজেৎ । সর্বারম্ভা হি দোষেণ ধূমেনাগ্নিরিবাবৃতাঃ ।। ৪৮

অসক্তবুদ্ধিঃ সর্বত্র জিতাত্মা বিগতস্পৃহঃ । নৈষ্কর্ম্যসিদ্ধিং পরমাং সন্ন্যাসেনাধিগচ্ছতি ।। ৪৯

সিদ্ধিং প্রাপ্তো যথা ব্রহ্ম তথাপ্নোতি নিবোধ মে । সমাসেনৈব কৌন্তেয় নিষ্ঠা জ্ঞানস্য যা পরা ।। ৫০

বুদ্ধ্যা বিশুদ্ধয়া যুক্তো ধৃত্যাত্মানং নিয়ম্য চ । শব্দাদীন্ বিষয়াংস্ত্যক্ত্বা রাগদ্বেষৌ ব্যুদস্য চ ।। ৫১

বিবিক্তসেবী লঘ্বাশী যতবাক্কায়মানসঃ । ধ্যানযোগপরো নিত্যং বৈরাগ্যং সমুপাশ্রিতঃ ।। ৫২

অহঙ্কারং বলং দর্পং কামং ক্রোধং পরিগ্রহম্ । বিমুচ্য নির্মমঃ শান্তো ব্রহ্মভূয়ায় কল্পতে ।। ৫৩

ব্রহ্মভূতঃ প্রসন্নাত্মা ন শোচতি ন কাঙ্ক্ষতি । সমঃ সর্বেষু ভূতেষু মদ্ভক্তিং লভতে পরাম্ ।। ৫৪

ভক্ত্যা মামভিজানাতি যাবান্ যশ্চাস্মি তত্ত্বতঃ । ততো মাং তত্ত্বতো জ্ঞাত্বা বিশতে তদনন্তরম্ ।। ৫৫

সর্বকর্মাণ্যপি সদা কুর্বাণো মদ্ব্যপাশ্রয়ঃ । মৎপ্রসাদাদবাপ্নোতি শাশ্বতং পদমব্যয়ম্ ।। ৫৬

চেতসা সর্বকর্মাণি ময়ি সংন্যস্য মৎপরঃ । বুদ্ধিযোগমুপাশ্রিত্য মচ্চিত্তঃ সততং ভব ।। ৫৭

মচ্চিত্তঃ সর্বদুর্গাণি মৎপ্রসাদাৎ তরিষ্যসি । অথ চেৎ ত্বমহঙ্কারান্ন শ্রোষ্যসি বিনঙ্ক্ষ্যসি ।। ৫৮

যদহঙ্কারমাশ্রিত্য ন যোৎস্য ইতি মন্যসে । মিথ্যৈষ ব্যবসায়স্তে প্রকৃতিস্ত্বাং নিয়োক্ষ্যতি ।। ৫৯

স্বভাবজেন কৌন্তেয় নিবদ্ধঃ স্বেন কর্মণা । কর্তুং নেচ্ছসি যন্মোহাৎ করিষ্যস্যবশোহপি তৎ ।। ৬০

ঈশ্বরঃ সর্বভূতানাং হৃদ্দেশেহর্জুন তিষ্ঠতি । ভ্রাময়ন্ সর্বভূতানি যন্ত্রারূঢ়ানি মায়য়া ।। ৬১

তমেব শরণং গচ্ছ সর্বভাবেন ভারত । তৎপ্রসাদাৎ পরাং শান্তিং স্থানং প্রাপ্স্যসি শাশ্বতম্ ।। ৬২

ইতি তে জ্ঞানমাখ্যাতং গুহ্যাদ্ গুহ্যতরং ময়া । বিমৃশ্যৈতদশেষেণ যথেচ্ছসি তথা কুরু ।। ৬৩

সর্বগুহ্যতমং ভূয়ঃ শৃণু মে পরমং বচঃ । ইষ্টোহসি মে দৃঢ়মিতি ততো বক্ষ্যামি তে হিতম্ ।। ৬৪

মন্মনা ভব মদ্ভক্তো মদ্‌যাজী মাং নমস্কুরু । মামেবৈষ্যসি সত্যং তে প্রতিজানে প্রিয়োহসি মে ।। ৬৫

সর্বধর্মান্ পরিত্যজ্য মামেকং শরণং ব্রজ । অহং ত্বাং সর্বপাপেভ্যো মক্ষয়িষ্যামি মা শুচঃ ।। ৬৬

ইদং তে নাতপস্কায় নাভক্তায় কদাচন । ন চাশুশ্রূষবে বাচ্যং ন চ মাং যোহভ্যসূয়তি ।। ৬৭

য ইদং পরমং গুহ্যং মদ্ভক্তেষ্বভিধাস্যতি । ভক্তিং ময়ি পরাং কৃত্বা মামেবৈষ্যত্যসংশয়ঃ ।। ৬৮

ন চ তস্মান্মনুষ্যেষু কশ্চিন্মে প্রিয়কৃত্তমঃ । ভবিতা ন চ মে তস্মাদন্যঃ প্রিয়তরো ভুবি ।। ৬৯

অধ্যেষ্যতে চ য ইমং ধর্ম্যং সংবাদমাবয়োঃ । জ্ঞানযজ্ঞেন তেনাহমিষ্টঃ স্যামিতি মে মতিঃ ।। ৭০

শ্রদ্ধাবাননসূয়শ্চ শৃণুয়াদপি যো নরঃ । সোহপি মুক্তঃ শুভাঁল্লোকান্ প্রাপ্নুয়াৎ পুণ্যকর্মণাম্ ।। ৭১

কচ্চিদেতচ্ছ্রুতং পার্থ ত্বয়ৈকাগ্রেণ চেতসা । কচ্চিদজ্ঞানসম্মোহং প্রনষ্টস্তে ধনঞ্জয় ।। ৭২

অর্জুন উবাচ - নষ্টো মোহঃ স্মৃতির্লব্ধা ত্বৎপ্রসাদান্ময়াচ্যুত । স্থিতোহস্মি গতসন্দেহঃ করিষ্যে বচনং তব ।। ৭৩

সঞ্জয় উবাচ - ইত্যহং বাসুদেবস্য পার্থস্য চ মহাত্মনঃ । সংবাদমিমমশ্রৌষমদ্ভূতং রোমহর্ষণম্ ।। ৭৪

ব্যাসপ্রসাদাৎ শ্রুতবানেতদ্ গুহ্যমহং পরম্ । যোগং যোগেশ্বরাৎ কৃষ্ণাৎ সাক্ষাৎ কথয়তঃ স্বয়ম্‌ ।। ৭৫

রাজন্ সংস্মৃত্য সংস্মৃত্য সংবাদমিমমদ্ভূতম্ । কেশবার্জুনয়োঃ পুণ্যং হৃষ্যামি চ মুহুর্মুহুঃ ।। ৭৬

তচ্চ সংস্মৃত্য সংস্মৃত্য রূপমত্যদ্ভুতং হরেঃ । বিস্ময়ো মে মহান্ রাজন্ হৃষ্যামি চ পুনঃ পুনঃ ।। ৭৭

যত্র যোগেশ্বরঃ কৃষ্ণো যত্র পার্থো ধনুর্ধরঃ । তত্র শ্রীর্বিজয়ো ভূতির্ধ্রুবা নীতির্মতির্মম ।। ৭৮