চতুর্দশ অধ্যায়ঃ গুণত্রয় বিভাগযোগ
চতুর্দশ অধ্যায়
শ্রীভগবানুবাচ - পরং ভূয়ঃ প্রবক্ষ্যামি জ্ঞানানাং জ্ঞানমুত্তমম্ । যজ্জ্ঞাত্বা মুনয়ঃ সর্বে পরাং সিদ্ধিমিতো গতাঃ ।। ১
ইদং জ্ঞানমুপাশ্রিত্য মম সাধর্ম্যমাগতাঃ । সর্গেহপি নোপজায়ন্তে প্রলয়ে ন ব্যথন্তি চ ।। ২
মম যোনির্মহদ্ব্রহ্ম তস্মিন্ গর্ভং দধাম্যহম্ । সম্ভবঃ সর্বতভূতানাং ততো ভবতি ভারত ।। ৩
সর্বযোনিষু কৌন্তেয় মূর্তয়ঃ সম্ভবন্তি যাঃ । তাসাং ব্রহ্ম মহদ্যোনিরহং বীজপ্রদঃ পিতা ।। ৪
সত্ত্বং রজস্তম ইতি গুণাঃ প্রকৃতিসম্ভবাঃ । নিভধ্নন্তি মহাবাহো দেহে দেহিনমব্যয়ম্ ।। ৫
তত্র সত্ত্বং নির্মলত্বাৎ প্রকাশকমনাময়ম্ । সুখসঙ্গেন বধ্নাতি জ্ঞানসঙ্গেন চানঘ ।। ৬
রজো রাগাত্মকং বিদ্ধি তৃষ্ণাসঙ্গসমুদ্ভবম্ । তন্নিবধ্নাতি কৌন্তেয় কর্মসঙ্গেন দেহিনম্ ।। ৭
তমস্ত্বজ্ঞানজং বিদ্ধি মোহনং সর্বদেহিনাম্ । প্রমাদালস্যনিদ্রাভিস্তন্নিবধ্নাতি ভারত ।। ৮
সত্ত্বং সুখে সঞ্জয়তি রজঃ কর্মণি ভারত । জ্ঞানমাবৃত্য তু তমঃ প্রমাদে সঞ্জয়ত্যুত ।। ৯
রজস্তমশ্চাভিভূয় সত্ত্বং ভবতি ভারত । রজঃ সত্ত্বং তমশ্চৈব তমঃ সত্ত্বং রজস্তথা ।। ১০
সর্বদ্বারেষু দেহেহস্মিন্ প্রকাশ উপজায়তে । জ্ঞানং যদা তদা বিদ্যাদ্বিবৃদ্ধিং সত্ত্বমিত্যুত ।। ১১
লোভঃ প্রবৃত্তিরারম্ভঃ কর্মণামশমঃ স্পৃহা । রজস্যেতানি জায়ন্তে বিবৃদ্ধে ভরতর্ষভ ।। ১২
অপ্রকাশোহপ্রবৃত্তিশ্চ প্রমাদো মোহ এব চ । তমস্যেতানি জায়ন্তে বিবৃদ্ধে কুরুনন্দন ।। ১৩
যদা সত্ত্বে প্রবৃদ্ধে তু প্রলয়ং যাতি দেহভূৎ । তদোত্তমবিদাং লোকানমলান্ প্রতিপদ্যতে ।। ১৪
রজসি প্রলয়ং গত্বা কর্মসঙ্গিষু জায়তে । তথা প্রলীনস্তমসি মূঢ়যোনিষু জায়তে ।। ১৫
কর্মণঃ সুকৃতস্যাহুঃ সাত্ত্বিকং নির্মলং ফলম্ । রজসস্তু ফলং দুঃখমজ্ঞানং তমসঃ ফলম্ ।। ১৬
সত্ত্বাৎ সংজায়তে জ্ঞানং রজসো লোভ এব চ । প্রমাদমোহৌ তমসো ভবতোহজ্ঞানমেব চ ।। ১৭
ঊধ্বং গচ্ছন্তি সত্ত্বস্থা মধ্যে তিষ্ঠন্তি রাজসাঃ । জঘন্যগুণবৃত্তিস্থা অধো গচ্ছন্তি তামসাঃ ।। ১৮
নান্যং গুণেভ্যঃ কর্তারং যদা দ্রষ্টানুপশ্যতি । গুণেভ্যশ্চ পরং বেত্তি মদ্ভাবং সোহধিগচ্ছতি ।। ১৯
গুণানেতানতীত্য ত্রীন্ দেহী দেহসমুদ্ভবান্ । জন্মমৃত্যুজরাদুঃখৈর্বিমুক্তোহমৃতমশ্নুতে ।। ২০
অর্জুন উবাচ - কৈর্লিঙ্গৈর্স্ত্রিন্ গুণানেতানতীতো ভবতি প্রভো । কিমাচারঃ কথং চৈতাংস্ত্রীন্ গুণানতিবর্ততে ।। ২১
শ্রীভগবানুবাচ - প্রকাশঞ্চ প্রবৃত্তিঞ্চ মোহমেব চ পাণ্ডব । ন দ্বেষ্টি সংপ্রবৃত্তানি ন নিবৃত্তানি কাঙ্ক্ষতি ।।২২
উদাসীনবদাসীনো গুণৈর্যো ন বিচাল্যতে । গুণা বর্তন্ত ইত্যেব যোহবতিষ্ঠতি নেঙ্গতে ।।২৩
সমদুঃখসুখঃ স্বস্থঃ সমলোষ্টাশ্মকাঞ্চনঃ । তুল্যপ্রিয়াপ্রিয়ো ধীরস্তুল্যনিন্দাত্মসংস্তুতিঃ ।। ২৪
মানাপমানয়োস্তুল্যস্তুল্যো মিত্রারিপক্ষয়োঃ । সর্বারম্ভপরিত্যাগী গুণাতীতঃ স উচ্যতে ।। ২৫
মাঞ্চ যোহব্যভিচারেণ ভক্তিযোগেন সেবতে । স গুণান্ সমতীত্যৈতান্ ব্রহ্মভূয়ায় কল্পতে ।। ২৬
ব্রহ্মণো হি প্রতিষ্ঠাহমমৃতস্যাব্যয়স্য চ । শাশ্বতস্য চ ধর্মস্য সুখস্যৈকান্তিকস্য চ ।। ২৭
মন্তব্যসমূহ