ত্রয়োদশ অধ্যায়ঃ ক্ষেত্রক্ষেত্রজ্ঞবিভাগযোগ
ত্রয়োদশ অধ্যায়
অর্জুন উবাচ - প্রকৃতিং পুরুষং চৈব ক্ষেত্রং ক্ষেত্রজ্ঞমেব চ । এতদ্বেদিতুমিচ্ছামি জ্ঞানং জ্ঞেয়ং চ কেশব ।। ১
শ্রীভগবানুবাচ - ইদং শরীরং কৌন্তেয় ক্ষেত্রমিত্যভিধীয়তে । এতদ্ যো বেত্তি তং প্রাহুঃ ক্ষেত্রজ্ঞ ইতি তদ্বিদঃ ।। ২
ক্ষেত্রজ্ঞঞ্চাপি মাং বিদ্ধি সর্বক্ষেত্রেষু ভারত । ক্ষেত্রক্ষেত্রজ্ঞয়োর্জ্ঞানং যত্তজ্জ্ঞানং মতং মম ।। ৩
তৎ ক্ষেত্রং যচ্চ যাদৃক্ চ যদ্বিকারি যতশ্চ যৎ । স চ যো যৎপ্রভাবশ্চ ত সমাসেন মে শৃণু ।। ৪
ঋষিভির্বহুধা গীতং ছন্দোভির্বিবিধৈঃ পৃথক্ । ব্রহ্মসূত্রপদৈশ্চৈব হেতুমদ্ভির্বিনিশ্চিতৈঃ ।। ৫
মহাভূতান্যহঙ্কারো বুদ্ধিরব্যক্তমেব চ । ইন্দ্রিয়াণি দশৈকঞ্চ পঞ্চ চেন্দ্রিয়গোচরাঃ ।। ৬
ইচ্ছা দ্বেষঃ সুখং দুঃখং সংঘাতশ্চেতনা ধৃতিঃ । এতৎ ক্ষেত্রং সমাসেন সবিকারমুদাহৃতম্ ।। ৭
অমানিত্বমদম্ভিত্বমহিংসা ক্ষান্তিরার্জবম্ । আচার্য্যোপাসনং শৌচং স্থৈর্যমাত্মবিনিগ্রহঃ ।। ৮
ইন্দ্রিয়ার্থেষু বৈরাগ্যমনহঙ্কার এব চ । জন্মমৃতুজরাব্যাধিদুঃখদোষানুদর্শনম্ ।। ৯
অসক্তিরনভিষ্বঙ্গঃ পুত্রদারগৃহাদিষু । নিত্যঞ্চ সমচিত্তত্বমিষ্টানিষ্টোপপত্তিষু ।। ১০
ময়ি চানন্যযোগেন ভক্তিরব্যভিচারিণী । বিবিক্তদেশসেবিত্বমরতির্জনসংসদি ।। ১১
অধ্যাত্মজ্ঞাননিত্যত্বং তত্ত্বজ্ঞানার্থদর্শনম্ । এতজ্জ্ঞানমিতি প্রোক্তমজ্ঞানং যদতোহন্যথা ।। ১২
জ্ঞেয়ং যত্তৎ প্রবক্ষ্যামি যজ্জ্ঞাত্বাহমৃতমশ্নুতে । অনাদিমৎপরং ব্রহ্ম ন সৎ তন্নাসদুচ্যতে ।। ১৩
সর্বতঃ পাণিপাদং তৎ সর্বতোহক্ষিশিরোমুখম্ । সর্বতঃ শ্রুতিমল্লোকে সর্বমাবৃত্য তিষ্ঠতি ।। ১৪
সর্বেন্দ্রিয়গুণাভাসং সর্বেন্দ্রিয়বিবর্জিতম্ । অসক্তং সর্বভৃচ্চৈব নির্গুণং গুণভোক্তৃ চ ।। ১৫
বহিরন্তশ্চ ভূতানামচরং চরমেব চ । সুক্ষ্মত্বাৎ তদবিজ্ঞেয়ং দূরস্থং চান্তিকে চ তৎ ।। ১৬
অবিভক্তঞ্চ ভূতেষু বিভক্তমিব চ স্থিতম্ । ভূতভর্তৃ চ তজ্জ্ঞেয়ং গ্রসিষ্ণু প্রভবিষ্ণু চ ।। ১৭
জ্যোতিষামপি তজ্জ্যোতিস্তমসঃ পরমুচ্যতে । জ্ঞানং জ্ঞেয়ং জ্ঞানগম্যং হৃদি সর্বস্য বিষ্ঠিতম্ ।। ১৮
ইতি ক্ষেত্রং তথা জ্ঞানং জ্ঞেয়ঞ্চোক্তং সমাসতঃ । মদ্ভক্ত এতদ্বিজ্ঞায় মদ্ভাবায়োপপদ্যতে ।। ১৯
প্রকৃতিং পুরুষঞ্চৈব বিদ্ধ্যনাদী উভাবপি । বিকারাংশ্চ গুণাংশ্চৈব বিদ্ধি প্রকৃতিসম্ভবান্ ।। ২০
কার্য্যকারণকর্তৃত্বে হেতুঃ প্রকৃতিরুচ্যতে । পুরুষঃ সুখদুঃখানাং ভোক্তৃত্বে হেতুরুচ্যতে ।। ২১
পুরুষঃ প্রকৃতিস্থো হি ভুঙ্ক্তে প্রকৃতিজান্ গুণান্ । কারণং গুণসঙ্গোহস্য সদসদ্যোনিজন্মসু ।। ২২
উপদ্রষ্টানুমন্তা চ ভর্তা ভোক্তা মহেশ্বরঃ । পরমাত্মেতি চাপ্যুক্তো দেহেহস্মিন্ পুরুষঃ পরঃ ।। ২৩
য এবং বেত্তি পুরুষং প্রকৃতিঞ্চ গুণৈঃ সহ । সর্বথা বর্তমানোহপি ন স ভুয়োহভিজায়তে ।। ২৪
ধ্যানেনাত্মনি পশ্যন্তি কেচিদাত্মানমাত্মনা । অন্যে সাংখ্যেন যোগেন কর্মযোগেন চাপরে ।। ২৫
অন্যে ত্বেবমজানন্তঃ শ্রুত্বান্যেভ্য উপাসতে । তেহপি চাতিতরন্ত্যেব মৃত্যুং শ্রুতিপরায়ণাঃ ।। ২৬
যাবৎ সংজায়তে কিঞ্চিৎ সত্ত্বং স্থাবরজঙ্গমম্ । ক্ষেত্রক্ষেত্রজ্ঞসংযোগাৎ তদ্বিদ্ধি ভরতর্ষভ ।। ২৭
সমং সর্বেষু ভূতেষু তিষ্ঠন্তং পরমেশ্বরম্ । বিনশ্যৎস্ববিনশ্যন্তং যঃ পশ্যতি স পশ্যতি ।। ২৮
সমং পশ্যন্ হি সর্বত্র সমবস্থিতমীশ্বরম্ । ন হিনস্ত্যাত্মনাত্মানং ততো যাতি পরাং গতিম্ ।। ২৯
প্রকৃত্যৈব চ কর্মাণি ক্রিয়মাণানি সর্বশঃ । যঃ পশ্যতি তথাত্মানমকর্তারং স পশ্যতি ।। ৩০
যদা ভূতপৃথগ্ভাবমেকস্থমনুপশ্যতি । তত এব চ বিস্তারং ব্রহ্ম সম্পদ্যতে তদা ।। ৩১
অনাদিত্বান্নির্গুণত্বাৎ পরমাত্মায়মব্যয়ঃ । শরীরস্থোহপি কৌন্তেয় ন করোতি ন লিপ্যতে ।। ৩২
যথা সর্বগতং সৌক্ষ্ম্যাদাকাশং নোপলিপ্যতে । সর্বত্রাবস্থিতো দেহে তথাত্মা নোপলিপ্যতে ।। ৩৩
যথা প্রকাশয়ত্যেকঃ কৃৎস্নং লোকমিমং রবিঃ । ক্ষেত্রং ক্ষেত্রী তথা কৃৎস্নং প্রকাশয়তি ভারত ।। ৩৪
ক্ষেত্রক্ষেত্রজ্ঞয়োরেবমন্তরং জ্ঞানচক্ষুষা । ভূতপ্রকৃতিমোক্ষঞ্চ যে বিদুর্যান্তি তে পরম্ ।। ৩৫
মন্তব্যসমূহ